السلام عليكم ورحمة الله وبركاته
بسم الله والحمد لله والصلاة والسلام على رسول الله صلى الله عليه وسلم وعلى آله وصحبه ومن تبعه بإحسان إلى يوم الدين .. وبعد
منظر مؤلم
لما تلاقى الأخوات الملتزمات (( عفوا )) اقصد اللي يقال عليهن ملتزمات
وتلاقي منهم الكلمات اللي مليانة حماس وهنعمل وهنعمل وهنكسر الدنيا
ووقت الجد تدوري عليهم تلاقي الأعذار سبقتهم
امال فين كلامكوا فين الحماس فين الهمة
معلش اصل عندي كذا اصل مفيش عندي وقت
ونلاقي الأعذار طلعت بالكوم
مش عندك وقت !!!!
طب ممكن تقوليلي انتى عايشة ازاى وليه
فين يااخوات الجدية ؟؟
منظر مؤلم أما ندور على محفظات قرآن للفترة الصيفية للأطفال
ندور على بنات ملتزمات يعلموا أطفالنا الأخلاق والسيرة وقصص الصحابة والأدب والأذكار
ولا نجد من الملتزمات سوى الأعذار !!!!
وعلى
النقيض بقى نلاقي الأخوات ذوات البنطال الضيق والبديهات والجيبات الضيقة
والكارينا بل والمكياج والعطر أيضا جايين ومتحمسين جداااا أنهم يشاركوا فى
الأجر والثواب
اقسم بالله أخوات ذات بنطال ياأخوات ياملتزمات بالزي الشرعى
مقعدوش يقولوا أصل عندنا وعندنا وفى لحظة يتقال ألف عذر
ده رحبوا جدا وفرحوا أنهم هيشاركوا فى الثواب
امال انتى يااختى الملتزمة قعدة بتعملى ايه ؟؟؟
عيب اوى والله أما تلاقي أختك التى اسأل الله أن يجعل مشاركتها فى الثواب بداية لهدايتها والله المستعان
عيب أما تكون هيا فى الميدان بتشارك وبتضع بصمة لها
ومسارعة للخير أكثر منك
وحضرتك قعدة واعتقد بل أجزم أن ممكن يكون عندك وقت فاضي أكثر منها
مفيش حد مننا مش بيضيع وقت
ونقول اصل عندنا الف عذر
عذرك ايه اختى الملتزمة لما تلاقي اخت صغيرة لسه يادوب فى تانية اعدادى
ولا اقولك لسه مدخلتش اعدادى اصلا
وحافظة لنصف القرآن بالتجويد
أخوها الصغير يحفظ متن الشاطبية
أخواتها الصغيرات بيحفظوا القرآن
والمفاجئة هي والدتهم الفاضلة اسأل الله أن يبارك لها فى أولادها ويحفظهم ويستعملهم ولا يستبدلهم وإيانا يارب
هذه الأم الفاضلة تعيش برجل واحدة ياأخوات والأخرى صناعية اسأل الله أن يعافينا جميعا
لم يمنعها مرضها من أن تأتى إلى المسجد لتحفظ الأخوات القرآن بالسند الي معاها وتعلمهم التجويد
وتقوليلي عندك عذر !!!!!
ماعذرنا يااختى والله مالدينا عذر
يمكن فى عذر واحد فقط
أن ذنوبنا أثقلتنا ومنعتنا من الحركة عن العمل لدين الله
وبئس هذا العذر
**********
انتى عايشة ازاى يااختى
لو عدى عليكي يوم مقرأتيش فيه وردك من القرآن
تبقي عايشة ازاى !!!!
لو عدى عليكي يوم محفظتيش آية واحدة أو آيتين
متعلمتيش شيء ينفعك فى هذا اليوم ويقربك من ربك
مسمعتيش درس أو قرأتى ولو صفحتين تلاتة من كتاب من كتب شيوخنا الأفاضل
يبقى انتى عايشة ازاى !!!!
هتقولي بيت وأولاد ومشاكل الأولاد
ده مش عذر يااختى
فى بيتك وتنضيفك تقدري تقضي الوقت ده كله بذكر الله
تنضفى وانتى بتذكري الله
تطبخي بردو وانتى بتذكري الله
وقبل ده كله تبدأى اصلا يومك بذكر الله
أولادك تقعدي معاهم تقرأي لهم من سيرة رسول الله
تربيهم على الأخلاق الحسنة وتعرفيهم ازاى كان خلق النبى صلى الله عليه وسلم
تعرفيهم الصحابة عملوا ايه وتحكي لهم قصص الأنبياء
تنزليهم المسجد يحفظوا القرآن وانتى معاهم
اخيتى
لو عدى عليكي يوم محستيش انك زدتى فيه خطوة للأمام
تبقى عايشة ازاى !!!
انتى
مش خايفة تكونى من الي قال فيهم ربك " وَلَـكِن كَرِهَ اللّهُ
انبِعَاثَهُمْ فَثَبَّطَهُمْ وَقِيلَ اقْعُدُواْ مَعَ الْقَاعِدِينَ "
انتى ناسية انك على ثغر أيا كان هذا الثغر اللى انتى عليه
لكن ليكي دور
فين دورك هل أديتي دورك ؟؟؟
هل نفعتى غيرك ؟؟؟
انتى حسة انك بتفيدي فعلا غيرك وبتستفيدي بردو فى نفس الوقت !!
انتى يااختى حاسه انك فيكي غيرة على دينك
طب الغيرة دي مجاش بقى وقتها انها تحركك للعمل
ولا هتفضل الغيرة دي فيكي لإمتى يعني ؟؟؟
**********
منظر مؤلم وصعب
أما نلاقي الملتزم والملتزمة أقعدهم عن العمل لدين الله الهم والإكتئاب
طالب علم من طلاب الشيخ الفاضل محمد حسان فى بلدة أخرى غير بلدة المنصورة
يحرص على حضور دروس الشيخ أولا بأول
يتصل بإبن من أبناء الشيخ عشان يقوله اعتذر للشيخ مش هقدر اجى الدرس انهارده (( درس الخميس بمسجد التوحيد ))
ليه يااخوات مجاش
اصله مهموم ومضايق ومكتئب فزود همه بأنه قعد ومحضرش الدرس
ولا ايه عذره ياترى ؟؟؟
عذره انه مش معاه فلوس عشان يسافر
بالله عليكم مش شيء يبكى
أن
يكون منه هذا الحرص على حضور الدرس فى الوقت اللي ممكن يكون بين أخ تانى
أو أخت وبين المسجد مجرد عشر دقائق ولا تحضر لمجرد الكسل أو انشغالات تافهة
أخ من بلد بعيدة بييجي ويتحمل أربع خمس ساعات سفر من أى بلد عشان يحضر درس للشيخ قد يكون الدرس ساعة واحدة
يعني سفر ذهاب وعودة ثمان ولا تسع ساعات والدرس ساعة واحدة
تحمل كل ده عشان ييجي الدرس ويحضر ويسمع كلام عن الله وعن رسول الله
**********
اختى الكريمة
انتى متأكدة انك عايشة !!
**********
اختى الكريمة
ايه الفرق بينك وبين الأخت الي متجاوزتش عشرين سنة
وسافرت إلى بلد ليس بها طعام ولا شراب جيد بل أسوأ ما يكون
بل بلد تملؤها الأسود
لكن راحت هناك عشان تعرض ديانتها النصرانية على الناس هناك
وتتحمل كل ده فى سبيل عقيدتها
تتهان وتذل فى سبيل انها تنشر عقيدتها
عارفة الفرق ايه
إنها على بااااااااطل ولكنها تدفع الغالى والثمين لنشره
وانتى على الحق لكنك متكاسله عن نشره وتبليغه
********
لو فضلت اتكلم مش هخلص أبدا
لكنها بمثابة جرس انذار لكل منا يااخوات
انتبهوا
لا نعلم كم تبقى لنا من العمر فى هذه الدنيا الفانية
ويكفينا ماضاع
فلن يأتى النصر أبدا بمثل هذه الهمم المتكاسلة
{يَا أَيُّهَا الَّذِينَ آمَنُوا إِن تَنصُرُوا اللَّهَ يَنصُرْكُمْ وَيُثَبِّتْ أَقْدَامَكُمْ }محمد7
منقووووووووووووووووول
الأربعاء أغسطس 11, 2010 7:13 am
